GMOA මහත්වරුනි.. පොඩ්ඩක් හරි ක්‍රියේටිව් වෙන හැටි Studentsලගෙන් ඉගෙන ගන්න

GMOA එක ආයෙත් ස්ට්‍රයික් කරනවා. ඒකත් ටෝකන් එකක්. පරණ මාධ්‍ය නිවේදනයම ආයෙ දානවා. හදිසි සේවා ක්‍රියාත්මකයිලු, මේ මේ හොස්පිටල් වල වර්ජනය ක්‍රියාත්මක නෑලු. ආදී වශයෙන්. මේ ස්ට්‍රයික් කිරිල්ල, මේ මාධ්‍ය නිවේදන, මේ ඉල්ලීම්, එදාට ඕපීඩී හරි ක්ලින්ක් හරි ගිහින් රස්තියාදුවෙලා එනගමන් මයික් එක අල්ලපුවහම මිනිස්සු බනින බැනිලි…. මේවා ලංකාවේ අපිට අතිශය සාමාන්‍ය දේවල් වෙලා… ඒවට තියන පුවත් වටිනාකමත් එකම මට්ටමක තියෙන්නෙ. නිවුස් වල උනත් මේක උපුටලා දක්වන්නෙ ඒ වර්ජනයෙ මූලික ඉල්ලීම් වලට වඩා ඒකෙ තියන බලපෑම පෙන්වන්න. මිනිස්සුන්ගෙ ඔලු වලට යන්නෙ ඇයි ඩොක්ටර්ස්ල ස්ට්‍රයික් කරන්නෙ කියන එකට වඩා මුන් කොච්චර අගතිගාමීද? මුන් මහ ත්‍රස්තවාදී සෙට් එකක්නෙ වගේ අදහසක්. 

ඒ ප්‍රධාන මාධ්‍ය. මීට සමගාමීව තියන සමාජ ජාලා, ප්‍රධාන වශයෙන් ෆේස්බුක් වල තත්වය මීට වඩා අලසයි. බෝරින්… ඔයාලගෙ ෆ්‍රෙන්ඩ් ලිස්ට් එකේඩොක්ටර්ස්ල කීපදෙනෙක් හරි ඉන්නවා නම් මේක හොඳටම දකින්න පුලුවන් වෙයි. මෙහෙම ස්ට්‍රයික් කරද්දි ඒකට ප්‍රතිරෝධය විදියට එන බැනුම් විචාර වලට ඒගොල්ලො ( ඩොක්ටර්ස්ල) මුහුණදෙන හැටි හරිම ප්‍රාථමිකයි. ෆේස්බුක් වල එයාලට බනිනකොට දෙන උත්තර දිහා බලන්න. නිකම්ම තේරෙයි. අනිත් කාරණය  වෛද්‍ය වරුන්ට සම්බන්ධ කිසිම ෆේස්බුක් ප්ලැට්ෆෝම් එකකින් (සරලවම කියනව නම් පේජ් එකකින් හරි ගෲප් එකකින් හරි) මේ සම්බන්ධ නිර්මාණාත්මක දෙයක් කෙරෙන්නෙ නෑ. මේ සම්බන්ධ මහජන අවධානය දිනා ගන්න විදියෙ සිමපල් වැඩක් වත් කෙරෙන්නෙ නෑ. ඒවගෙන් කෙරෙන එකම දේ තම තමන්ගෙ ආතල් එකට මොනවා හරි හදාගෙන ඒවා තමන්ගෙ පිරිස අතරෙ පමණක් බෙදාගෙන පාඩුවෙ ඉන්න එක. ස්වයං වින්දනයෙ යෙදෙන එක. 

මේ තත්වය ඉස්සර ශිෂ්‍යයො අතරත් තිබුනා. ඒගොල්ලො යන පිකට් එකම විදිහටයි තිබුනෙ. එකම විදිහෙ සටන් පාඨ, එක විදියෙ පෝස්ටර්, එකම විදියෙ කටවුට්. පිකට් එකක් කියපුවාම හිතට මැවෙන පින්තූරයක් හැමෝගෙම හිත් වල තිබුනා. මිනිස්සුන්ට කොලඹ පිකට් කියන එක කරදරයක් මදිවට බෝරින් , කිසිම ත්‍රිල් එකක් නැති වැඩක් වෙලා තිබුනෙ. එකම බැනර් ටිකක් උස්සගෙන, එකම සටන් පාඨ ටිකක් කියව කියව, එකම පාරවල් ටිකක් දිගේ කොල්ලුපිටියට ඇවිත් වතුර පාරවල් ටිකක් කාලා පොලිසියට බැනලා අඬලා යන එක නිවුස් වල දකින එක මිනිස්සුන්ට ටීවී එකේ සප්නා හරි ඉශිතා හරි බලනවා වගේ සාමාන්‍ය දෙයක් වෙලා තිබුනේ. ෆේස් බුක් වලත් එයාලගෙ ( ශිෂ්‍යයන්ගෙ) ක්‍රියාදාමය එක වගේ වෙලා තිබුනේ…… හැම පිකට් එකකටම පස්සෙ දවසෙ පොලිසියෙන් ගහන සීන් එකකට හරි කට්ටියක් එකතුවෙලා වතුර පාරක් කන සීන් එකකට හරි පේලි හයක විතර ඇඬෙන නිසදසක් ලියලා ශෙයා කරන එක හරිම කොමන් වැඩක් වෙලා තිබුනෙ. ඒ තරමට ස්ටිරියෝ ටයිප්. 

මට හිතෙන්නෙ එයාලටම ඒ වැඩේ බෝරි උනා. පිකට් එකක් කියලා කියනකොටම අර පරන විදිය මතක් වෙලා උන්ටම ඒක ඔක්කාරෙට එන්න ඇති. ඒ නිසාද කොහෙද දැන් ටික ටික පිකට් වැඩේ වෙනස් වෙලා… ප්‍රතිරෝධය හෝ විරෝධතාවය දක්වන්න වෙන ක්‍රම නැත්ද කියලා හොයන්න අරන්. මීඩියා වල ඇටෙන්ෂන් එක ගන්න, ෆෙස් බුක් වල ශෙයා කරන්න හිතෙන, අනිත් මිනිස්සුන්ටත් බලන්න/ කියවන්න හිතෙන දේවල් දැන් දැන් මේ පොඩි උන් අතින් එලියට එන්න අරන්… පරණ වමේ අරගලය මහ පාරෙන් පොඩ්ඩක් අයිනට අරන් කල්පනා කරන්න අරන්. වෙන කොහෙන් හරි කොපි කරලා හරි කමක් නෑ මේ වෙන වැඩේ මට නම් අතිශය කූල්. 

මට පේන හැටියට වැඩේ පටන් ගත්තේ මොරටුව සෙට් එක. ( ලංකාවෙ අනික් කැම්පස් වලට වඩා මොරටුව ගව් ගානක් දුරින් ඉන්නෙ ) 

Guy Fawkes Mask එක ලංකාවෙ ශිෂ්‍ය ව්‍යාපාරය ඇතුලට ගෙනාවෙ උන්. ඒ වගේම බෝරින් වෙලා තිබුන SAITM විරෝධයට නැවත පණ ගහලා පබ්ලිසිටියක් ගෙනත් දුන්නෙ උන්. හොඳට හෝ නරකට බැනුම් අහලා හරි නැතුව හරි උන් අලුත් වැඩක් ලස්සනට කරලා පෙන්නුවා.. ෆේස්බුක් එකේ මේකට බනින්න ගත්තා, හැම පේජ් එකක්ම වගේ මේ වැඩේ ගැන තමන්ගෙ දැක්ම ප්‍රකාශකරන්න ගත්තා… අනිත් රටවල් වල මීට කලින් මේ වගේ වැඩ කෙරිලා තියනවද කියලා හිතන්න ගත්තා, සයිටම් උනුත් මේකට උත්තර දෙන්න ඊලඟ මැච් එකේ ලෑස්ති වෙලා හිටියා…අන්තිමේදි මේ රැල්ල දුර දිග ගිහිල්ලා ස්ටේඩියම් එකෙන් නීතියක් ගෙනාවා එහෙම විරෝධතා ප්‍රදර්ශනය කරන්න දෙන්න බෑ කියලා… ඉතින් ලැබුන පබ්ලිසිටිය මදිද??

මේ විදියෙ වැඩ කිහිපයක්ම ඊට පස්සෙ කෙරුනා. රෑ තිබුන පිකට් එක මාර eye-catching වැඩක්. ඊට පස්සෙ එකකට එකක් සම්බන්ධවෙන විදියට පාර දිගේ බෝඩ් අල්ලගෙන හිටපු උද්ගෝෂණයක් තිබුනා හරියටම තැන මතක නෑ.. ඒ වගේ අදහසක් හරිම වෙස්ටර්න්.. වෙනදා දහ දාහක් දෙනා ඇවිත් අල්ලගෙන හිටියත් කියවන්නෙ නැති බෝඩ්ස් එදා මිනිස්සු කියවන්න ඇති… 

ෆේස් බුක් එකෙත් ලකුණු සීයෙන් අනූ ගනන් දෙන්න පුලුවන් වැඩ කිහිපයක් කෙරෙනවා පේනවා… පේජ් කිහිපයක් මේ වැඩේ ඉදිරියෙන් ඉන්නවා.. පොඩි පොඩි වීඩියෝ කෑලි තම තමන්ට පුලුවන් විදියට හදලා අප්ලෝඩ් කරනවා.. වැඩිපුරම දැක්කෙ Know Saitm පේජ් එකේ…. ඒවා ඇත්තටම සයිටම් වලට පක්ෂ අයත් බලනවා.. මග අරින්න හිතෙන්නෙ නෑ.. මේ විෂුවල් වැඩ පටන් ගැන්මක් විදියට අදහස මාර ක්‍රියේටිව්. ඉස්සරහට වෙන්න තියෙන්නෙ ඒ මාධ්‍යයෙන් තව තව වැඩ කෑලි දාන එක තමයි. තව ලස්සන වැඩක් දැක්කා…..සාමාන්‍යයෙන් ස්ට්‍රයික් කරන ඩොක්ටර්ස්ල එපැයි එයාලා ඇයි ස්ට්‍රයික් කරන්නෙ කියලා සමාජයට කියන්න. නමුත් මේ වැඩේටත් අතගහලා තියෙන්නෙ මල්ලිලා ටිකක්. උන් පුලුවන් විදියට කැමරා එකකුයි මයික් එකකුයි හොයාගෙන ඩොක්ටර්ස්ල කීප දෙනෙක් ඉන්ටවිව් කරලා පොඩි documentary එකක් හදලා. මතක හැටියට තිබුනෙ Abolish Saitm පේජ් එකේ. හරි නම් මේ වැඩේ කෙරෙන්න ඕනෙ GMOA එක අතින්. එහෙම අනුන්ගෙ වැඩත් කරගෙන මේ විරෝධයත් ක්‍රියේටිව් විදියට ඇදගෙන යන මේ පොඩි එවුන් ගැන මට තියෙන්නෙ මාර රෙස්පෙක්ට් එකක්. 

GMOA එක ඒ අතින් ගොඩක් පසුගාමියි. අයිඩියාස් අතින් ක්‍රියේටිවිටි අතින් ගොඩක් දුප්පත්. හැමදාම එක විදියට ස්ට්‍රයික් කරන්නෙ නැතුව, එකම විදියට press conference වලදි තග දාන්නෙ නැතුව, එකම විදියට ෆේස්බුක් වල වැඩ කරන්නෙ නැතුව අලුතෙන් හිතන්න කාලය දැන් ඇවිත්. මේ වැඩේ ගොඩ දාන්න ඕනෙම නම් ස්‍ට්‍රයික් නොකර ගොඩ දාන විදි ඕනෙ තරම් ඇති. ඒවා හොයාගන්න ඕන නම් පොඩ්ඩක් අලුත් විදියට හිතන එකයි තියෙන්නෙ.  එහෙම හිතන අයට පොඩ්ඩක් ඉඩ දෙන්නත් ඕනෙ. ස්ට්‍රයික් කරන්න්න්න්න්න්න්න්න්න්නම ඕනෙ නම් ඒකත් අලුත් විදියකට කරන්න. තවත් මිනිස්සුන්ට බොරින් වෙන්න එපා..

Advertisements

කවදාවත් ඩොක්ටර් කෙනෙක්ගෙන් උපදෙසක් ගන්න එපා…


මේ පත්තර කෑල්ල දැක්කෙ එක්තරා පුවත් පතකින්. මේ අහලා තියන ප්‍රශ්නෙට උත්තර දීලා තියෙන්නෙ ලංකාවෙ දැනට ඉන්න තලතුනා නම ගිය මහාචාර්යවරයෙක්. 

මේකෙදි සරලව අහලා තියෙන්නෙ තමන් විවාහ වීමට බලාපොරොත්තුව ඉන්න කෙනා ලේ නෑයෙක් වෙන නිසා එහෙම විවාහ වෙන්න බයක් තියනවා, ඒ නිසා එහෙම විවාහ වෙන්න සුදුසුද කියලා… මහාචාර්යවරයා මේකට උත්තර දෙනවා අංශ දෙකකින්. එකක් සමාජමය පැත්තෙන්, අනික වෛද්‍යවිද්‍යාත්මකව. 

ඔහු කෙලින්ම කියනවා මේ විවාහය සමාජ විරෝධීයි කියලා. ඔවුන් විවාහ උනොත් ප්‍රායෝගිකව ඔවුන්ට මුහුණ දෙන්න වෙන අපහසුතා ඔහු විස්තර කරනවා. බය හිතෙන විදියට. ඊට පස්සෙ ඔහු ලේ නෑකමක් නිසා ජාන වලින් එන්න පුලුවන් නිදන් ගත රෝග ගැන යම් අවවාදයක් දෙනවා. ඔහුගේ පිලිතුරේ සාරාංශය වන්නේ මේ මගුල නම් කරන්න එපා කියන එක. 

මට තියන ගැටළුව තමයි, මේ ගැන උපදෙස් දීලා තියන ශික්ෂාව සහ දීලා තියන උපදෙස් කොච්චර දුරට විද්‍යාත්මකද කියන එක. මේ ප්‍රශ්නය අහන කෙනාට මේ ප්‍රශ්නය උගත්කෙනෙක්ට යොමු කරලා යම් උත්තරයක් ගන්න තියන උවමනාවෙ විද්‍යාත්මක ගතියවත් මේ මහාචාර්ය වරයා දෙන උත්තරේ නෑ.. මම එහෙම කිව්වෙ මේ ප්‍රශ්නය අහන්නෙ ලංකාවෙ ප්‍රවීන මහාචාර්ය කෙනෙක්ගෙන්. ගොඩක් දුරට එහිදි ඇය බලාපොරොත්තු වෙන්නෙ  මේ ප්‍රශ්නයෙ වෛද්‍යවිද්‍යාත්මක පැත්ත වෙන්න පුලුවන්. ඇය මේ ගැටළුව වෙනත් ෆෝරම් වලට නොදා, ජ්‍යෝතිශ්‍ය සම්බන්ධ කෙනෙක්ගෙන් නොඅසා, වෛද්‍යවරයෙක්ගෙන් අහන්නෙ මේ සම්බන්ධව ඇගේ තියන විද්‍යාත්මක ප්‍රවේශය නිසයි. 

නමුත් මේ මහාචාර්ය තැන ඒකට උත්තර දෙන්නෙ සම්පූර්ණයෙන් විද්‍යාත්මක ප්‍රවේශයෙන් බැහැර වෙලා. ඔහු මෙච්චර කාලෙකට ඉගෙන ගත්ත විද්‍යා දැනුම, විද්‍යාත්මක අත්දැකීම්, ප්‍රශ්නයක් විසඳන් විද්‍යාත්මක ක්‍රම මේ සියල්ල පසෙක දාලා ඔහු එකවරම උත්තර දෙන්නෙ ඔහුගෙ පුද්ගලික ජීවිතයේ ඔහු දරාගෙන ඉන්න මති මතාන්තර වලින්. හරියට නිකම් තමන්ගෙ දරුවෙක් මේ විදියෙ විවාහයක් කරගන්න යනකොට ඒකට එරෙහි වෙද්දි වගේ. එතකොට ඒක ඔහුගෙ පුද්ගලික ජීවිතය. එහිදි තීරණ ගන්නකොට නූතන දැනුම පාවිච්චි කරනවද, පරම්පරාගත දැනුම පාවිච්චි කරනවද කියන එක ඔහුට බාරයි. නමුත්  වෘත්තීය ජීවිතයේදී ඔහුට එහෙම බෑ. ඔහු ක්‍රියා කලයුත්තෙම යම්කිසි ප්‍රමිතියකට අනුව. ඒකෙදි ඔහුගේ පුද්ගලික විස්වාස, ඇදහිලි, මතිමතාන්තර අදාල නෑ.. මෙතනදි වෙලා තියෙන්නෙත් ඒක. 

ඔහු නියම වෘත්තීය විදියට මේ ප්‍රශ්නය දිහා බැලුවොත් පත්තරයකින් උත්තරයක් දෙන්නෙ නෑ…. මේක හමුවෙලා සාකච්ඡා කලයුතු කාරණයක් බවට උපදෙස් දිය යුතුයි. ඒ සඳහා යා යුත්තේ කා ළඟටද කියා උපදෙස් දිය යුතුයි. උදාහරණයක් හැටියට මේකෙදි මේ විවාහය ව්‍යවහිචාරය ( incest ) ගණයට වැටෙනවද කියලා බලන්න නීතිමය උපදෙස් ගන්න යොමු කල යුතුයි. ඊට පස්සෙ විවාහය සඳහා සූදානම් වෙන්න අවශ්‍ය නම් කවුන්සලින් වලට යොමු කල හැකියි. ඉන් පසුව ළමුන් බිහිකරනවාද නැද්ද  , බිහිකරනවා නම් ජානමය පරීක්ෂණ ( genetic screening ) , ළමයෙක් පිලිසිඳ ගත්තොත් දුබලතා හෝ අසාමාන්‍යතා පිලිබඳ ගර්භාශයේදීම පරීක්ෂන කිරීම, දරුවා බිහිකිරීමට සූදානම් කිරීම ආදී නොයෙක් ඒවාට අවශ්‍ය මග පෙන්වීම කල හැකියි. Genetic Counselling කියන්නෙ ලොකු විෂයක්. ඒකෙදි සේවාලාභීයාගේ කැමැට්ත අකමැත්ත අනුව අවශ්‍ය ක්‍රියාමාර්ග ගන්න පුලුවන්. ලංකාවෙ ඒ අවශ්‍ය පහසුකම් සහ යම් පමණකට ප්‍රමාණවත් නීතිමය ප්‍රතිපාදන තියනවා. එහෙම නැතුව genetic counselling  කියන්නෙ මෙතන කියනවා වගේ මෙහෙම ලේ නෑයින්ට විවාහ වෙන්න පුලුවන්ද කියලා අහපුවාම ඇඟටකඩා පැනලා බෑහ් කියන එක නෙමෙයි. 

ලංකාවෙ ගොඩක් ඩොක්ටර්ස්ලට තියන ප්‍රශ්නයක් ඕක. යම් කෙනෙක් සෞඛ්‍යය ගැන හෝ වෙනයම් දෙයක් ගැන ප්‍රශ්නයක් අහලා ඒක විසඳන්න යම් උදව්වක් ඉල්ලුවොත් ගොඩක් වෙලාවට ලැබෙන්නෙ ඩොක්ටර්ට කැමති පිලිතුර. හරියට නිකම් ඩොක්ටර් ඒ ප්‍රශ්නෙට මුහුණ දුන්නා නම් එයාගෙ මති මතාන්තර, ඇදහිලි විස්වාස අනුව එයා ගන්න ක්‍රියාමාර්ගය වගේ. නමුත් හරි විදියට වෘත්තීය වශයෙන් කල යුත්තේ ගැටලුවට මුහුණදෙන කෙනා එක්කත් සාකච්ඡා කරලා, තමන් විද්‍යාත්මකව ගත්ත දැනුමත් ඒකට යොදවලා, ඒ ගැන ඒ පුද්ගලයාගේ අවබෝධය වැඩිකරලා, අවසාන තීරණය ගන්න එයාට උදව් කරන එක. ඒ තීරණය ක්‍රියාත්මක කරන්න ප්‍රායෝගිකව පහසුකම් සලස්සන එක. අවාසනාවකට මේ දේ අපේ ඩොක්ටර්ස්ල ළඟ පිහිටලා නෑ. ප්‍රොෆෙසර් මෙහෙම නම් අනිත් අය ගැන අහන්නත් දෙයක්ද. 

වෛද්‍යවරයා යනු උසස් රැකියාවක්ද?

උත්තම මානසිකත්වය සහ Herd Mentality  ලංකාවේදී එකට එක් වූ කල…. 


මේ ලිපියේ අරමුණ වන්නේ මේ වනවිට ලංකාවේ වෛද්‍යවරුන්ගේ හැසිරීම් සහ ආකල්ප වලින් ගම්‍යවන මානසිකත්වය පිලිබඳ යම් විශ්ලේශනාත්මක විග්‍රහයක් කිරීමටයි. දැනට අපගේ බ්ලොග් අඩවිය එතරම් ව්‍යාප්ත වී නැතත් මේ ලිපිය යම් ඇවිස්සීමකට මුලපිරීමකට තරම් විවාදාත්මක කරුණු අන්තර්ගතයි. ඕනෑම විවේචනයක් බාර ගැනීමට සූදානම්. 
වර්තමානය වන විට වෛද්‍යවරයා පිලිබඳ සමාජයේ තිබෙන්නෙ එතරම් හොඳ පිලිගැනීමක් නොවේ. ඒ ගැන කිසිදු විවාදයක්  නෑ. මේ තත්ත්වය මීට අවුරුදු කීපයක සිටම පැවතුණත් මේ සයිටම් ප්‍රශ්නයේදී ඔවුන් හැසිරුණු ආකාරය නිසා මේ තත්වය වඩාත් නරක අතට හැරුණු බවයි අපගේ අදහස. මෙයට හේතුව මේ ලිපියේ මුඛ්‍ය අදහස වන පොදුවේ වෛද්‍යවරුන්ට අනන්‍ය සිතීමේ රටාව නිසා සිදූ වූවක්. සයිටම් ප්‍රශ්නයේදී සිද්ධ උනේ ඒ සිතීමේ රටාව උද්දීපනය වීම සහ එනයින් එලියට ගම්‍යවූ හැසිරීම වඩ වඩා සමාජයට නිරාවරණය වීමයි. දැන් අපි මේ සිතීමේ රටාව ගැන සොයා බලමු.
කුඩා කල පන්තියේදී ගුරුවරයෙකු හා සිසුවකු අතර ඇතිවන මේ මනකල්පිත දෙබස ගැන අවධානය යොමු කරන්න. මොහොතකට ඔබ සිසුවාට ආරෝපණය වී බලන්න. විශේෂයෙන් මේක කියවන වෛද්‍යවරුන්..

ගුරුවරයා – පුතා/ දුව ඔයා ලොකු උනාම කවුරුවෙන්නද කැමති?


සිසුවා – ඩොක්ටර් කෙනෙක්


ගුරුවරයා – හොඳයි.. ඇයි ඔයා ඩොක්ටර් කෙනෙක් වෙන්න කැමති?


සිසුවා – මම කැමතියි දුප්පත් අසරණ මිනිස්සුන්ට උදව් කරන්න. 


ගුරුවරයා – ඒත් ඇයි ඔයා එහෙම උදවු කරන්න ඩොක්ටර් කෙනෙක්ම වෙන්න ඕනෙ? ඔයාට පුලුවන්නෙ ගුරුවරයෙක් වෙලා දුප්පත් ලමයින්ට උගන්වන්න, නගර සභාවට බැඳිලා දුප්පත් මිනිස්සුන්ට උදවු කරන්න, ග්‍රාමසේවක කෙනෙක් වෙලා ගමේ මිනිස්සුන්ට උදවු කරන්න,….? 


සිසුවා – නෑ ටීචර් ඩොක්ටර් කෙනෙක් කියන්නෙ මිනිස්සුන්ගෙ ජීවිත එක්ක වැඩ කරන කෙනෙක්නෙ. මම ඩොක්ටර් කෙනෙක් උනොත් මට ජීවිත කීයක් බේරගන්න පුලුවන් වෙයිද!


ගුරුවරයා – ඇයි පුතා ඉතින් ඔයා ආමි එකට හරි පොලිසියට බැඳුනොත් ඔයාට ඒ වගේම ජීවිත බේරගන්න පුලුවන්නෙ?  ඇම්බියුලන්ස් එකක ඩ්‍රයිවර් කෙනෙක් කොච්චර ජීවිත බේරනවද?  අවංකව කියන්නකො ඔයා ඇයි ඩොක්ටර් කෙනෙක් වෙන්න හිතුවෙ?
 

දැන් ඒ සිසුවා ඔබ නම් ඔබ මොකක්ද දෙන උත්තරය? ඇත්තටම ඇයි ඩොක්ටර් කෙනෙක් වෙන්නෙ? අපේ වෛද්‍යවරු ඇයි ඒ රස්සාව තෝරාගෙන තියෙන්නෙ? 
ඇත්ත උත්තරය තමා ඒ රස්සාවට ලැබිලා තියන ප්‍රතිරූපය. පොඩි කාලෙ ඉඳලා වෛද්‍යවෘත්තිය ගැන අපිට මවා පාලා තියෙන්නෙ ඒ ප්‍රතිරූපය තමා ඩොක්ටර් කෙනෙක් කියන්නෙ පූජනීය, උසස්, උතුම් , දෙවිකෙනෙක් වගේ තනතුරක් කියන එක. ඩොක්ටර් කෙනෙක් වෙන්න ආසාකරන පහේ පන්තියෙ පොඩි එකාගෙ ඉඳලා හිත්වල රෝපණය වෙන්නෙ මේ ප්‍රතිරූපය. මේක දලුදාලා දලුදාලා මුල් ඇදලා තියන හිතින් උසස්පෙලට තෝරගන්නවා ජීව විද්‍යා විෂය දහරාව. පහේ පන්තියෙදි වගේ ෆැන්ටසියකින් නෙමේ මෙතනදි තීරණය එන්නෙ සවිඥානිකව. නමුත් මෙතනදිත් ගාමක බලය වෙන්නෙ මේ කියපු ප්‍රතිරූපය. මේ ගාමක බලය මේ පුද්ගලයාගෙ ජීවිතය පුරාම බලපවත්වනවා. මේ හිතෙන් මවාගෙන ඉන්න ප්‍රතිරූපය ( idealise ) අනුව තමයි තමුන්ගෙ ජීවිතය පුරාවටම හිතන පතන විදිය තීරණය වෙන්නෙ. 
මෙහෙම ඉඳලා මේ ශිෂ්‍යයා වෛද්‍ය පීඨයට යනවා. ඔහු එතැන් පටන් මුහුණදෙන දුෂ්කරතා වලට සමාන්තරව  ඔහුගේ හිතේ ඉන්න අර ප්‍රතිරූපයත් මුහුණ දෙනවා, ඒ ප්‍රතිරූපයත් තව තව මෝරනවා. ඒ දුෂ්කරතා වලදි ඔහු හිත හදා ගන්නෙ අනාගතයේදී ඔහු ඉන්න තැන ගැන මනසේ ඇඳෙන චිත්‍රය ( ප්‍රතිරූපය ) ගැන හිතලා. මෙහෙම නඩත්තු කරන ප්‍රතිරූපය වෛද්‍ය පීඨයෙන් එලියට එනකොට ගොඩක් මෝරලා.. පීඨයට ඇතුලුවෙනකොට හිතේ තිබුන රූපයට වඩා ලොකු demand එකක් තියන රූපයක් හිතේ ඇඳිලා ඉවරයි.
දැන් මේ වෛද්‍යපීඨයේ ඉන්න ශිෂ්‍යයා ආශ්‍රය කරන්නෙ ඒ හා සමානම සිතීම් රටාවක් තියන පිරිසක්. ඔවුනොවුන් තනිතනිව හිතන විදිය සමානයි. එහෙම වෙන්නෙ මේ සෑම කෙනෙක්ගෙම ඉලක්කය, අභියෝග, මුහුණ දෙන දුෂ්කරතා ආදිය සෑම කෙනෙක්ටම බොහෝදුරට අදාල නිසා. අනෙක් කාරණය මෙතනදි මුලින් සඳහන් කරපු හිතේ ඉන්න ප්‍රතිරූපය එකක් වීම. ඉතින් මේ කරුණු කාරණා ඔක්කොම ගත්තම මේගොල්ලො හිතන්න පතන්න ගන්නෙ එකම විදියට.
මේකට කියන්නෙ Herd Mentality කියලා.  නමින් ඇඟවෙන්නා වගේම මේක ගොඩක් දකින්න ලැබෙන්නෙ රංචු වශයෙන් ඉන්න සතුන් අතරෙ. උදාහරණයකින් ගත්තොත් කොටියෙක්ගෙන් බේරෙන්න දුවන මුව රංචුවක් ගත්තොත් මේ රංචුවෙ හැම මුවාම ඒ වෙලාවෙ හිතන්නෙ කොටියගෙන් බේරෙන්න පුලුවන් තරම් වේගෙන් රංචුව මැද්දට වෙන්න දුවන්න ඕනෙ කියලා. ඉතින් පිටින් බලන් ඉන්න කෙනෙක්ට පෙනෙන්නෙ එකිනෙකාට තෙරපි තෙරපි කොටියගෙන් ඈතට දුවන මුව රංචුවක්. වෛද්‍ය වෘත්තියෙදිත් මේ රටාව ගොඩක් නිරීක්ෂණය කරන්න පුලුවන්.  කැම්පස් කාලෙ ඉඳලා එකම විදියට හිතන පිරිසක් එක්ක ඉන්නකොට මේ තත්ත්වය ඇතිවීම ස්වභාවිකයි. හැමෝගෙම හිත්වල තියෙන්නෙ එකම බලාපොරොත්තු  , එකම බිය, එකම සන්තාපයන්. නොදැනුවත්වම herd mentality වලට යනවා.. 
මේක මම හිතන්නෙ ලංකාවෙ අපට විතරක් දකින්න පුලුවන් ලක්ෂනයක් නොවෙයි. නමුත් ලංකාවෙදී මේකට එකතුවෙනවා තමන් අනිත් අයට වඩා උසස් කියලා හිතන “උත්තම මානසිකත්වය”. මේ විදියට හිතෙන එක වෛද්‍යවරුන්ට ආවේනික ලක්ෂනයක් නෙමෙයි. වෙනත් සමාජයේ උසස් විදියට සැලකෙන වෘත්තීන් බොහොමයක තියෙන්න ඉඩකඩ තිබෙනවා. මේ දේ වෛද්‍යවරුන්ගේ වඩා කැපී පෙනෙන්නෙ ඔවුන් මිනිස්සුන්ට වඩා සමීප, වඩා සංවේදී කරුණු එක්ක ගනුදෙනුවක යෙදෙන නිසා කියලා හිතන්න පුලුවන්. එහෙම යෙදිලා ඉන්න නිසා ස්වභාවිකවම මිනිස්සුන්ගෙ කෘතවේදීත්වය, ස්තූතිය, කොටින්ම ලකුණු ලැබෙනවා.  ඒ ස්වභාවිකව සහ රෝගියා විසින් ආයාසයකින් තොරව ප්‍රදානය කරන ගෞරවය කාලයක් යනකොට තමාට ලැබිය යුතු අයිතිවාසිකමක් විදියට වෛද්‍යවරයා තේරුම් ගන්නවා. මේ කාරණයේදී රෝගියාගේ/සාමාන්‍ය පුරවැසියාගේ පැත්තෙනුත් වැඩවසම් හැසිරීමක් නිරීක්ෂණය කරන්න පුලුවන්. මේක මෙපමණ උඩුදුවන්න ඔවුනුත් වගකිවයුතුයි. ඒක් වෙන දවසක කතා කරමු. නමුත් වඩා ලොකු ප්‍රශ්නය වෙන්නෙ වෛද්‍යවරුන් තමා විසින් දිනාගතයුතු ගෞරවනීයත්වය, තමාට හිමි දෙයක් විදියට නඩත්තු කරගෙන යන එක. තනි තනි පුද්ගලයො හැටියට නොව වඩා විශාල කණ්ඩායමක් විදියට කුලවාදී , ගෝත්‍රවාදී දැක්මක් කරා මේ මානසිකත්වය විහිදිලා යනවා. මේක රටක දේශපාලනය එක්ක එකතු වුනාම තව දරුණු වෙනවා. සෑම කාරණයකදීම තමාගේ දැක්ම , තමා දරන ස්ථාවරය මත පිහිටලා කටයුතු කල යුතුයි කියන නාසිසිසම් තත්වයට දැන් ප්‍රශ්නය ඔඩු දුවලා තියෙන්නෙ. සයිටම් ප්‍රශ්නය විතරක් නෙමේ වෙලඳගිවිසුම් අත්සන් කරන එක වගේ රටක දැවැන්ත දේශපාලන තීන්දුවලට බලපෑම් එල්ල කලහැකියි, එල්ල කලයුතුයි කියන තැනට මේ සිතීමේ රටාව ඇවිල්ලා ඉවරයි. “ඩොක්‍ටර් ඩොක්ටර්ගෙ වැඩක් බලාගෙන ඉන්න” කියලා කටක් ඇරලා කියන්න බැරි වෙලා තියෙන්නෙ සමාජයෙ තියන ඩොක්ටර්ස්ල දිගටම නඩත්තු කරගෙන යන මේ පිස්සුවිකාර ගෞරවනීය තැන නිසා.. ඒ බම්බුවෙ නම්බුව නිසා.

ආයතනගත වීමට ඇති ආසාව 2

පළමු ලිපියෙන් ලංකාවේ මිනිස්සුන්ගෙ ආයතන ගත වෙන්න තියන ආසාව රෝගීන් ආශ්‍රයෙන් සාකච්ඡා කලා. මේ ලිපියෙන් ඒ ගතිය වෙනස් කරන්නෙ කොහොමද කියලා කතා කරනවා. 
මේ හැසිරීමට හේතුව ලෙස විස්තර කලේ ස්වාධීනව තීරණ ගැනීමේ නොහැකියාව සහ මැලි කම. එතකොට මේ ප්‍රශ්නයට උත්තරේ විදියට තියෙන්නෙ මේ “ස්වාධීනව තීරණ ගැනීමේ හැකියාව ” ඇති කරන්නෙ කොහොමද කියන කාරණය මතයි. 
මේක ලේසි පහසු කාර්යයක් නෙමෙයි. කෙටි කාලයකින් කරන්න පුළුවන් දෙයකුත් නෙමෙයි. කෙනෙක්ට ස්වාධීනව තීරන ගැනීමේ බලයක් ඇති කරන්න නම් ඒක හරි විදියට කරන්න ඕනෙ. ඒක වල්බූරු නිදහසක් විදියට දෙන එක භයානකයි.  යම් ස්වාධීනත්වයක් ඇතිකරගන්න නම් ඒ ස්වාධීන වෙන කෙනාට තමන් විසින් ගන්නා තීරණවල බර ගැන අවබෝධයක් තියෙන්න ඕනෙ. එහෙම බර ගැන අවබෝධයක් ලැබෙන්න නම්  තීරණ ගැනීමේ පසුබිම හරියට සකස්වෙලා තියෙන්න ඕනෙ. මේ පසුබිම තමා අධ්‍යාපනය. 
විධිමත් හා අවිධිමත් කියන අධ්‍යාපන ක්‍රම දෙකම මේකෙදි ප්‍රයෝජනයට ගන්න පුලුවන්. මූලිකවම පාසල් අධ්‍යාපනයේදී සෞඛ්‍යය ගැන මූලික දැනුමක් ලබාදීම අනිවාර්‍යය කරුණක්. මේ දැනුම හුදෙක් සිද්ධාන්තමය කරුණු වලට එහා ගිය ප්‍රායෝගික, ව්‍යවහාරික ( applicable ) දැනුමක් විය යුතුයි. Fundamentals ගැන අවබෝධයක් ලැබීම කෙනෙක්ගෙ ස්වාධීන තීරණ ගැනීමේ හැකියාව වැඩිදියුණු කරාවි. මේ පාසල් අධ්‍යාපනයේදී අනිවාර්යයෙන් ලැබියයුතු තවදෙයක් තමා සෞඛ්‍යයට සම්පත් කාර්යක්ෂව භාවිතයට ගන්නේ කෙසේද කියන කාරණය. මේක ඇත්තටම සෞඛ්‍යය පැත්තෙන් විතරක් නෙමේ එදිනෙදා ජීවිතයේදී යෙදෙන ඕනෑම කාරණයක් වෙනුවෙන් පාවිච්චි කරන්න ගන්න පුලුවන්. අපේ අධ්‍යාපන ක්‍රමයෙදි නොකෙරෙන්නෙත් ඒක. අපිට සේවා ලබා ගන්න තියන ආයතන යාන්ත්‍රණ මොනවද, ඒවයින් සේවා ලබා ගන්නා ආකාර මොනවද, තියන සීමා මොනවද, අඩුපාඩු මොනවද කියන දැනුම ප්‍රායෝගික තලයෙන් ලබා දීමක් සිදුවෙන්නෙ නෑ. උදාහරණයක් හැටියට බැංකුවකට ගිහින් වැඩක් කරගන්නෙ කෙහොමද, රාජ්‍ය ආයතනයකට ගිහින් වැඩක් කරගන්නෙ කොහොමද, රටේ තියන විව්ධ රජ්‍ය ආයතන වල විවිධ සේවා බෙදිලා යන්නෙ කොහොමද වගේ කාරණා සියලු දෙනාම දැන ගන්නෙ පාසල් අධ්‍යාපනය හරහා නෙමේ තම තමන්ගෙම අත්දැකීම් හරහා. මේ හේතුව නිසා මේ සේවාවන් අපතේ යන අවස්ථා බොහෝයි. සෞඛ්‍යය පැත්ත ගත්තම මේ තත්වය අන්තිමයි.  

මූලිකවම මේ විධිමත් අධ්‍යාපනය මිනිසුන්ගෙ සාක්ශරතාව ( අකුරු කියවීමේ ලිවීමේ හැකියාවම නෙමේ ) දියුණු වුනාම මේ ප්‍රශ්නය නිකන්ම හරියයි. නමුත් ඒ වෙනකම් දශක ගානක් බලන් ඉන්න වෙනවා. මේ ක්‍රියාදාමය ඉක්මන් කරන්න අවිධිමත් අධ්‍යාපනය උදවු කරගන්න පුලුවන්. මේකට මිනිසුන්ගේ අධ්‍යාපනයට සහ සෞඛ්‍යයට ඇති අවස්ථා පුලුල් කරන්න වෙනවා. මේ අවස්ථාවලට යම් මිලක් ගෙවීම අනිවාර්යයෙන් සිදුවිය යුත්තක්. එසේ “මිල ” කියන සාධකය “සේවාවට” ඉදිරියෙන් වැටුනම මේ “සේවාව” ලබාගැනීමට ස්වයං අධ්‍යනයක් කරන එක සේවාව ලබා ගන්න කෙනාට අනිවාර්යයෙන්ම කරනවා. මොකද ඒ සේවාවෙ ප්‍රයොජ්‍ය වටිනකම ගෙවන්නෙ තමා විසින්ම නිසා ඒ තක්සේරුව නිවැරදිද යන්න තමන් විසින්ම සොයාබලන්න සිද්ද වෙන නිසා. ඒක තමා නියමම අවිධිමත් අධ්‍යාපනය. මේක නොමිලේ ලැබෙන සේවයකදි කෙරෙන්නෙ නෑ. උදාහරණයක් වශයෙන් නොමිලේ ලැබෙන රෝහල් සේවාවකදි ඒ සේවාවෙ වටිනාකම ගෙවන්නෙ තමන් නොවන නිසා එතනදි ඒකෙ ප්‍රයෝජ්‍ය වටිනාකම තක්සේරු කරන එකේ බරක් තමන්ට දැනෙන්නෙ නෑ. අධ්‍යාපනයෙ අවශ්‍යතාවයක් එතනදි මතු නොවෙන්නෙ ඒ නිසා.  සේවාවන් පෞද්ගලිකකරණය කිරීම ධනාත්මක වෙන්නෙ ඒ අර්ථයෙන්. 
සේවාවන් පුද්ගලිකකරණය වීම ලංකාවෙ සෞඛ්‍යය පැත්තෙන් ගත්තම ගොඩක් දුර්වල අවධියක තියෙන්නෙ. මේක රාජ්‍ය එහෙමත් නැත්නම් නිදහස් සෞඛ්‍ය සේවයෙන් වෙනස් වෙන්නෙ බොහොම පොඩ්ඩකින්. නමුත් මම මේක දකින්නෙ නිදහස් වෙලඳපොල පරිණාමයේදි ලංකාව පෙන්නුම් කරන හෙමින් ගමනෙම තව එක අංගයක් විදියටයි. හෙමින් උනත් ලංකාව කවදහරි හොඳ වෙලඳපොලක් බිහිකරන එක අනිවාර්‍යයි. සරල නිරීශණයක් විදියට මේ වෙනකොට අන් සියලු භාණ්ඩ හා සේවාවන් වල පුද්ගලික අංශය අත්පත් කරගෙන තියන දියුණුව දැනට අවුරුදු දහයකට විතර කලින් වෙලඳපොලත් එක්ක සන්සන්දනය කරලා බලන්න පුලුවන්. මේ කාරණයෙදි කෙනෙක්ට වෙලඳපොලේ තියන බාල ප්‍රමිතියෙන් තොර තැන් පෙන්වල දෙන්න පුලුවන්. නමුත් ඒවා නුදුරු අනාගතයේදී ක්ශීන වෙලා යන්න නියමිතයි. නමුත් කොච්චර හොඳ වෙලඳපලක උනත් මේ වගේ යම් යම් බාල දේවල් බලාපොරොත්තු වෙන්න පුලුවන්. කලයුත්තෙ මේ දේවල් හැකිතාක් අවම කරගන්න , ඒවා වෙලඳපල විසින්ම ප්‍රතික්ශේප වෙන්න දියුණු වෙලඳපොලක් බිහිකරන එක. එහෙම නැතුව ආපහු සියල්ල රාජ්‍යකරණය කරන එක නෙමේ. 
මේ දියුණු නිදහස් වෙලදපොලක් ඇති කරගත්තට පස්සෙ මිනිස්සුන්ට සේවාවන් ලබා ගැනීමේදී තියන අවස්ථාපරමාණය වැඩි වේවි. අවස්ථා බහුවිධ වේවි. සෞඛ්‍යය පැත්තෙන් ගත්තම මිනිස්සුන්ට සෞඛ්‍ය සේවා ලබා ගන්න තියන තෝරාගැනීම් වැඩි වේවි. මේ තෝරාගැනීම් අතර තරඟය වැඩිවෙනකොට වඩා නිවැරදි තෝරාගැනීම කරන්න හොඳ අධ්‍යනයක් කිරීම අනිවාර්යයෙන් කරන්න වේවි. මේ විදියට සබුද්ධික විනිශ්චයක් ඇතුව සේවාවන් භාවිත කරන්න පටන් ගත්තම මිනිසුන්ට තමන්ගෙ සෞඛ්‍යය ගැන වඩා හොඳ තීරණ ගන්න හොඳ දැනුමක්, පුහුණුවක් ලැබෙයි. වඩා දියුණු ලෝකයකින් බලාපොරොත්තු වෙන්න ඕනෙ ඒකයි.
ඔව් සියල්ල බැඳ ඇති බැමි ලිහිල් කිරීම තමා විසඳුම.

ආයතනගත වීමට ඇති ආසාව


නීති රීති වලට යටත් වෙන්න , ආයතනගත වෙන්න ලංකාවෙ මිනිස්සුන්ගෙ තියෙන්නෙ පුදුම ආසාවක්. මේක හොඳටම දකින්න ලැබෙනවා රෝහල් වලදී. අපේ මිනිස්සුන්ගෙ සෞඛ්‍යය ගැන තියන  මූලික දැනුම, සෞඛ්‍ය සේවා වලට යොමු  වීමේදී දකින්නට ලැබෙන ප්‍රාථමික හැසිරීම වගේ කරුණු තවදුරටත් රෝහල් වලදී නිරීක්ෂණය කරන්න පුලුවන්.
මූලික සෞඛ්‍ය සත්කාරය එහෙම නැත්නම් primary health care කියන සංකල්පය ලංකාවෙ ක්‍රියාත්මක වෙන්නෙ හරිම නොදියුණු විදියට. මේ සංකල්පයට අනුව යම් ප්‍රතිකාරයක්දි එහි වැඩි වගකීමක් ගන්න ඕනෙ රෝගියා. සෞඛ්‍යය ක්ෂේත්‍රයේ කෙනෙක්ට තියෙන්නෙ අවශ්‍ය කරන උපදෙස් , ප්‍රතිකාර නිර්දේශ කරන එක විතරයි. ඒ කාරණයට විතරක් වෛද්‍යවරයෙක්ව හමු උනා නම් ඇත්තටම ඇති. රෝහලකදි මේ සඳහා ඇත්තටම අවස්ථාව තියෙන්නෙ බාහිර රෝගී අංශය, සායන වගේ අංශ වලින්. නමුත් රෝගීන් පුරුදු වෙලා ඉන්නෙ සම්පූර්ණයෙන් වෙනස් ක්‍රමයකට. සරල උදාහරණයක් ගමුකො.
උණ තියන රෝගියෙක් සලකමු. ඇත්තටම සාමාන්‍ය සෞඛ්‍ය දැනීමක් ඇති කෙනෙක් උණ ගැනෙන පළවෙනි දවසෙම ප්‍රතිකාර සඳහා වෛද්‍යවරයෙක්ට යොමු වීමේ අවශ්‍යතාවය තමන්ගෙ දැනුමෙ හැටියට මැනලා බලනවා. ඒ කියන්නෙ එක දවසෙ උණකට හැම වෙලාවෙම වෛද්‍යවරයෙක් මුණගැහෙන්න ඕනෙ වෙන්නෙ නෑ. ඒක සාමාන්‍ය දැනීම. සමහර අවස්ථා තියනවා එහෙම එක දවසෙ උණකට වෛද්‍යවරයෙක් හමු වෙලා උපදෙස් ගන්න ඕනෙ කරන. ඒකත් සාමාන්‍ය දැනීම ( common sense ). උදාහරණයකට උණත් එක්ක වෙන අසාමාන්‍ය රෝග ලක්ෂන පහල වෙනවා නම්, උණ අසාමාන්‍ය විදියට තදට ගැනෙනවනම්, විශේෂ බෝවන උණ රෝගයක් පැතිරෙන කාලයක් හෝ ප්‍රදේශයක දී වගේ නම් උණ හැදෙන පළමු දවසෙදිම වෛද්‍ය වරයා හමුවන එකේ වරදක් නෑ. මේ හැරුනු විට වෙන ඕනෑම උණකදි ඇත්තටම අවශ්‍ය වෙන්නෙ උණ පාලනය කරන්න පැය හයෙන් හයට පැරසිටමෝල් කියන බේතයි, විවේකයයි, වැඩිපුර දියර වර්ග ගැනීමයි විතරයි.  මේ විදියට මුලින් ටිකක් බලලා දවස් තුනක් විතර යනකොට උණ අඩුවුනේ නැත්නම් හරි අර මුලින් කියපු අසාමාන්‍ය රෝග ලක්ෂන මතුවුනොත් හරි වෛද්‍යවරයෙක් හමුවෙන්න ඕනෙ. ඒ වෛද්‍යවරයා බලලා අවශ්‍ය පරීක්ෂණ එහෙම කරලා නේවාසිකව ප්‍රතිකාර කරන්න අවශ්‍ය නම් ඒක නිර්දේශ කරයි. එතකොට තමා ඇට්තටම නැවතිලා ප්‍රතිකාර ගන්න ඕනෙ. නමුත් අපේ අය පුරුදුවෙලා ඉන්නෙ වෙනත් දෙයකට. අපේ අයගෙ පිලිවෙල වෙන්නෙ මෙහෙම.
අද මේ දැන් උණ හැදුනොත් හරි, නිකම් උණ හැදෙන්න වගේ තිබුනොත් හරි , අම්මෝ බලන් ඉඳලා බෑ. ඩොක්ටර් කෙනෙක් හම්බෙන්න යන්න ඕනෙ. සල්ලි නැති ආර්ථිකව පහල මට්ටමේ ඉන්න කෙනෙක් නම් යනවා opd එකට. පොඩ්ඩක් හරි රුපියල් පන්සීයක් හොයාගන්න පුලුවන් කෙනෙක්නම් යනවා ප්‍රයිවට් බේත් දෙන සාමාන්‍ය ඩොක්ටර් කෙනෙක් ගාවට. සල්ලි යහමින් තියන කෙනෙක් නම් යනවා කෙලින්ම consultant කෙනෙක් ගාවට. මේ කොහෙන් හරි ගිහින් අර පැරසිටමෝල් විතරක් බීලා නිවාඩු පාඩුව ගෙදරට වෙලා ඉඳලා සනීප කරගන්න තිබුන අසනීපෙ සල්ලි වියදම් කරලා හෝ ආණ්ඩුවෙ සල්ලි නාස්ති කරලා හෝ බොරුවට දොස්තර දෙන බේත් වලින් සනීප කරගන්න යනවා. බැරි වෙලා හරි උණ දවස් තුනක් තිබුනොත් ?? “අම්මෝ මේ එනපොට නම් හොඳ නෑ. ඩොක්ටර්ගෙ බේත් වලට අඩු උනෙත් නෑනෙ. ගිහින් වාට්ටුවෙ නවතින්න ඕනෙ. ” එහෙම කියලා ගිහින් නවතිනවා වාට්ටුවෙ. ඉතින් හරි විදියට නම් පළමුවෙන්ම opd හරි private හරි ඩොක්ටර් කෙනෙක්ව හමු වෙන්න තිබෙන අවස්ථාවෙ ගිහිල්ලා වාට්ටුවෙ නතර වෙනවා. නතර වෙලා වාට්ටුවෙ ඉඳගෙන පැරසිටමෝල් පෙත්ත විතරක් බොනවා. එක පාරක් ලේ මුත්‍රා බලනවා. පහුවදා උණ අඩු වෙනවා. ඉතින් ටිකට් කපලා ගෙදර එනවා. මේ ටිකම opd එකේදි හරි ඩිස්පෙන්සරි එකේදි හරි assess කරගන්න තිබුනා.
මෙහෙම වෙන්නෙ ඇයි?
ඒක තමා ආයතන ගත වීමට මිනිස්සුන්ගෙ තියන ආසාව. තමන්ගෙ සෞඛ්‍යය ගැන තමුන්ට තීරණ ගැනීමේ බිය සහ මැලිකම. එහෙම තීරණ ගැනීමෙ බලයට බයක් එනකොට , ඒ බලය වෙන කාටහරි ( ඩොක්ටර් ) පවරලා , ආයතනයක ව්‍යුහ ගත වෙලා ( ඉස්පිරිතාලෙ ), නීතිරීති වලින් තමන්ව ටික වෙලාවකට පාලනය කරන්න කියලා යටත් වෙන්න අපේ අය කැමතියි. මේක මම මේ කියපු කාරණා එක්ක විසංයෝජනය කරලා බලමු. අහෙම්.. !
1.තීරණ ගැනීමේ බලය

එහෙම බලයක් අපේ මිනිස්සුන්ට ඇලජික්. කොටින්ම ස්වාධීන කියන සංකල්පය අපේ අයට අලුත්. තනියම තීරණයක් ගැනීම කියන්නෙ තව කවුරුහරි කියන දේකට අවනත නොවීම නෙමේ. නෑ නෑ. ඒක නෙමෙයි. ඒක තමා මම කීවෙ ස්වාධීන කියන සංකල්පය අලුත් කියලා. මෙතනදි ඇත්තටම ස්වාධීන නම් විලෝපිකයාව අමතක කරන්න ඕනෙ. හතුරෙක් තර්ජනයක් නැති තැන අපි හැසිරෙන්නෙ කොහොමද? අන්න එතන තමයි නියම ස්වාධීන කම තියෙන්නෙ. හරියට පාලු දූපතක තනියම ඉන්නකොට වගේ. කාට මොකට බය වෙනවද. මේ ප්‍රශ්නෙදිත් එහෙමයි. තමන්ගෙ හෙල්ත් එක ගැන තමන්ට තීරනය කිරීමේ අධිකාරී බලයක් හැම කෙනාටම තියනවා. (ඔන්ලි එක්සෙප්ෂන් එක සියදිවි හානි කරගැනීම සහ යුතෙනේසියා එක පමණයි. ඒකත් දැන් විවාදයට ගැනෙනෙවා. ) ඉතින් තමන් ඉන්නෙ තමන්ගෙ දූපතේ කියලා හිතාගෙන තීරණය ගන්නයි තියෙන්නෙ. ඒත්… අපේ අයට?? බෑ අපේ අයට මේ සංකල්පය අලුත්. ඒ ගොල්ලො හැම වෙලාවෙම ඉන්නෙ කවුරුහරි කෙලවලා දායි කියලා බයකින්. ස්වාධීන කියන අදහසට උනත් ඒ ගොල්ලොන්ගෙ අර්ථකතනය වෙන්නෙ “උඩින් කවුරු හරි කියන එකට අවනත නොවීම” කියන එක. ඉතින් මේ ලේ වලට කිඳා බැහැපු බය අත ඇරලා එන්න බැරි නිසා තමන්ගෙ සෞඛ්‍ය ගැන තමන්ට තීරණයක් ගන්න බෑ.

2. නීති රීති වලට යටත් වීම.

මේක ස්වාධීන නොවීම කියන එකට එන ඊලඟ ස්ටෙප් එක වෙනවා. තමුන් ස්වාධීන නැත්නම් තමන්ගෙ පැවැත්මට නීති රීති ඕනෙ වෙනවා. හරියට ව්‍යුත්පන්න කරොත් තමන්ගේ ආරක්ශාවට තමන් කරන්න ඕනෙ මොනවද, නොකරන්න ඕනෙ මොනවද කියලා වෙනත් කවුරුන් හරි විසින් නියම කරලා තියෙන්න ඕනෙ. ඉස්පිරිතාලෙදි නම් පැරසිටමෝල් පෙත්ත බොන්න ඕනෙ කීයටද , නැගිටින්න ඕනෙ කීයටද, නිදාගන්න ඕනෙ කීයටද, කන්න ඕනෙ මොනවද, කන්න පුලුවන්ද බැරිද, නාන්න පුලුවන්ද බැරිද ආදී වශයෙන් මේ සියලු දේවල් වාට්ටුවෙන්ම නියම කරනවා. හරි ලේසියි. තමන් ගෙදර හිටියනම් ( ස්වාධීන ) මේ සේරම තීරණය කරන්න ඕනෙ තමුන්මයි. අපෝ එහෙම බෑ. මට කවුරුහරි කියන්නම ඕනෙ.

3. ආයතන ගත වීම.

මේ තීරන ගැනීමේ බලය, නීති රීති හරියට සංවිධානය වුනු ලස්සන පද්ධතියක් තියනවා නම් වැඩේ ලේසියි. එතකොට එක වහලක් යටින් මේ ඔක්කොම කරගන්න පුලුවන්. ඔන්න එතකොට රෝහල කියන වටිනා ආයතනය එනවා. මේ ආයතනයෙ මේ ඔක්කොම තියනවා. තීරණ ගැනීමේ බලය ඩොක්ටර්ට දීලා තියනවා. නීති රීති තියනවා. ඒවා ක්‍රියාත්මක කරන්න පරිසරය සහ පුද්ගලයො ඉන්නවා.. ශහ්!! ස්වාධීන නැති කෙනෙක්ට ඉන්න කියාපු තැන. 

ඔන්න ඔහොමයි අපේ අය ආයතනගත වෙන්නෙ.
මේක කොහොමද වෙනස් කරන්නේ?? ඊළඟ ලිපියෙන්.